Ngā Tohu Kairangi
Ko ēnei whakamāramatanga kia titirohia ngātahitia me ngā hātepe whakamana, whakaae hoki kei roto i te tānga NZQA, "Approval and Accreditation of Courses Leading to Degrees and Related Qualifications (2008)".
Te whakamāramatanga o ngā Tohu Kairangi
He tohu mātauranga rangahau te tohu kairangi, teitei ake te kaupae, nui ake te mana i te tohu paerua. Ko te tikanga, koinei te wāhanga whakamutunga o tētahi akoranga raupapa i te whakanōhanga mātauranga ka tīmata mai i te kaupae o te Tohu Paetahi, ā, ka tae atu ki tētahi kaupae i tua atu i te Tohu Paerua, ka motuhake haere te tauira, ā, ka takoha ia i te mātauranga nui, hou hoki.
Mō te PhD\DPhil me te tohu kairangi kua whakaingoatia, ka taka ōna whanaketanga ki raro i te whakaruruhau o ētahi tohunga, kua mōhiotia tō rātau tohungatanga e pā ana ki taua pekanga mātauranga, i te wāhi hoki ka āhei te tauira ki ngā rauemi rangahau tika.
Ka whakawhiwhia te Tohu Kairangi i runga anō i te takohanga taketake, nui hoki ki te mātauranga e ai ki te whakawākanga o ētahi tohunga motuhake, e whakamahi ana i ngā paerewa ā-Ao, o ēnei rā hoki. Ko te waitohu, te kaha o te kaitono ki te rangahau motuhake, mahi auaha rānei (mō te PhD\DPhil me te tohu kairangi kua whakaingoatia) e ai ki tōna whakanōhanga mātauranga, ki/āna mahi tāpae hoki/rānei.
Ko te rangahau taketake te wāhanga matua o ngā tohu kairangi katoa. Ko te mahi nui e tae ai ki te whakawhiwhinga o te tohu kairangi, ko tētahi o ēnei e whai ake nei:
- he tuhinga whakapae (PhD\DPhil)
- he mahi auaha i roto i ngā toi ataata, toi whakaari rānei (PhD\DPhil)
- he tuhinga whakapae, mahi auaha ōrite rānei me ētahi atu mahi akoranga (te Tohu Kairangi ka whakaingoatia)
- he tuhinga whakapae me tētahi atu mahi auaha i roto i ngā toi ataata, toi whakaari rānei (te Tohu Kairangi ka whakaingoatia)
- he tānga (te Tohu Kairangi o runga)
Ngā whakaritenga whiwhinga
Ko te 240 whiwhinga i te kaupae 10 e pā ana ki te rangahau whatutoto te itinga rawa mō te Tohu Kairangi.
Ko ēnei ngā momo Tohu Kairangi e whakaaetia ana:
Te Tohu Kairangi Rapunga Whakaaro (PhD\DPhil)
Ko te tuhinga whakapae te katoa o ngā mahi ka whakawākia mō te tohu mātauranga. Ka whakatakotoria hoki he mahi akoranga mā te tauira, engari ka hāngai tēnei ki te whakatika mō te rangahau me te whakaaetanga kia hou atu ki roto i te hōtaka tohu kairangi. Ko ngā tauira o ngā toi ataata, toi whakaari rānei ka tāpae kēi te mahi auaha hei whakakī i te wāhi ki te tuhinga whakapae.
Te Tohu Kairangi i tētahi pekanga mātauranga, marau kua whakaritea - te tohu kairangi kua whakaingoatia (hei tauira EdD, DMus rānei)
Mō tētahi Tohu Kairangi i tētahi marau kua whakaritea, ka whai wāhi pea te mahi akoranga ki te hōtaka ka aromatawaitia. Engari kia rua tau ā-kura te roa o te rangahau me ngā mahi e pā ana ki te tuhinga whakapae, ā, he rua hautoru o ngā whiwhinga katoa me hāngai ki te rangahau me te tuhinga whakapae.
Ko ngā mahi akoranga, ka whakatakotoria ki te kaupae teitei ake i te tohu paetahi, me noho hei wāhanga o tētahi hōtaka raupapa me te mahi rangahau, ā, kia kaua e nui ake te roa i te kotahi tau ā-kura.
Ko te kaitono mō te Tohu Kairangi kua whakaingoatia, me mātua riro i a ia he tohu taumata whiwhinga i roto i te mahi rangahau me te tuhinga whakapae, he mahi auaha e ōrite ana.Te Tohu Kairangi Tiketike Rawa (hei tauira: DSc, DLitt rānei)
Ka whakawhiwhia te Tohu Kairangi Tiketike Rawa mō te mahi motuhake hiranga rawa, e ai anō ki ngā tohunga kei mua i te Ao e haere ana, ka oti i mua i te whakaurunga mō te tohu kairangi. Ko te tikanga kia tekau tau ngā kaitono e mahi motuhake ana, ā, kua tāngia whānui ā rātau mahi.
Ka tāngia ngā tuhinga i roto i ngā pukapuka mātauranga, i ngā hautaka ingoa pai hoki/rānei huri noa i te Ao. Ko te tūmanako mō ngā kaitono i ngā toi ataata, toi whakaari rānei, he ōrite te takohanga i roto i ā rātau mahi auaha.