Te Tohu Paetahi
He whakamōhio ā-pūnaha, raupapa hoki te tohu paetahi ki te mātauranga, ngā whakaaro, ngā mātāpono, ngā ariā, ngā tikanga rangahau matua me ngā tikanga whakatau raruraru e pā ana ki tētahi pekanga mātauranga (ngā pekanga mātauranga rānei, mēnā he tohu paetahi taurua, he kaupapa rua rānei).
Ka herea te kaitono ki te whakatutuki i ētahi whakaritenga pū, i runga anō i ngā whakaritenga tohu mātauranga e hāngai mai ana, me tētahi hōtaka raupapa, i reira ka whanaketia haeretia te ihirangi kia reri ai te kaitono mō te akoranga paerua me te rangahau ka whakahaeretia. Ka whakatikangia te kaitono mō te akoranga whatutoto me te rangahau ka whakahaeretia me te karahipi i ngā kaupapa ako matua o te tohu mātauranga.
Ko ngā hōtaka tohu mātauranga paetahi i te nuinga o te wā, ka whakaakongia e ngā tāngata e mahi rangahau ana; ā, ka whakaputaia ngā mātāpono whānui me te mātauranga matua hei pūtake mō ngā mahi me te akoranga kāore e whakahaeretia. (s254 Te Ture Mātauranga,1989)
Te Whakauru
Ko te hōtaka akoranga e tae atu ai ki te Tohu Paetahi, ka whai atu i ngā mahi, ngā wheako rānei kua tutuki kē, ā, e wātea ana ki ērā tāngata kua tutuki i ngā whakaritenga pū e pā ana ki te whakauru.
Ngā Hua
Ko te kaitono kua pōtaetia ki te Tohu Paetahi:
- ka whakaatu i te mātauranga me ngā pūkenga e pā ana ki ngā whakaaro, ngā mātāpono, ngā ariā, ngā tikanga rangahau matua me ngā tikanga whakatau raruraru o tētahi kaupapa ako matua (ngā kaupapa ako rānei, mēnā he tohu paetahi taurua, he kaupapa rua rānei);
- ka whakaatu i ngā pukenga ka hiahiatia kia whiwhi, kia mātau me te aromatawai i ngā kōrero mai i tētahi huinga o ngā matatiki;
- ka whakaatu i te whakaaro motuhake, te wānanga whakaaro, me te kaha o te tātari;
- ka uru ki roto i te mahi kāore e whakahaeretia; me
- te whakaatu i ngā pūkenga whakawhitiwhiti kōrero me ngā pūkenga mahi tahi
Ngā Whakaritenga Whiwhinga
Mo te Tohu Paetahi, ko te 360 whiwhinga te itinga rawa e hiahiatia ana mai i ngā kaupae 4 - 7. Mō ētahi Tohu Paetahi, arā ngā marau ngaio pērā ki te Raweke Pūkaha, ngā Pūtaiao Hauora me te Ture, he whiwhinga anō e hiahiatia ana, nā reira ka roa ake pea te wā akoranga. Hei tauira, ko te tohu paetahi e waru kaupeka, e whā tau te roa, e ōrite ana ki te 480 whiwhinga.
O ngā whiwhinga e hiahiatia ana mō te Tohu Paetahi, kia 72 whiwhinga te itinga rawa mai te kaupae 7. Kia 20 whiwhinga te nuinga rawa mai i te kaupae 4 (kia ū tonu ki te pono o te tohu mātauranga i ngā taumata teitei ake).
Kia āta whakarārangi te tohu paetahi i ngā whiwhinga e hiahiatia ana puta noa i ngā kaupae mā reira e whakaata ai ngā whakaritenga o tōna whakamāramatanga, ā, ka whakatutuki i ngā hua akoranga i runga anō i te tika ki te wāhi kaupapa ako.
Te hononga ki ētahi atu tohu mātauranga
Ko te tangata e pupuri ana i te Tohu Paetahi ka āhei te whakauru ki te Pōkairua Paerua, ki te Tohu Paerua rānei.